Рәмзилә Хисаметдинова шиғриәте

Описание

Рәмзилә Хисаметдинова шиғриәте. Яҙ билгеһе һаналған умырзая сәскәһе бар тирә – яҡҡа матурлыҡ, наҙ өләшкәндәй, Рәмзилә Хисаметдинованың шиғриәте лә кешелеккә үҙ йылыһын, яҙын бүләк итә. Уның ижадын умырзая сәскәһе менән сағыштырыу юҡҡа түгел. Һәр юлынан һөйөү, һағыш, сафлыҡ бөркөлөүе наҙлы яҙ сәскәһен хәтерләтә. Яҙ сәләмендәй ҡыҫҡа ғүмере лә бик үкенесле, ә күпме тағы яҙ гөлләмәһен бүләк иткән булыр ине уның хисле йөрәге! Рәмзилә Минғәле ҡыҙы Хисаметдинова 1949 йылдың 28 майында Учалы районы Сәфәр ауылында донъяға килә. Мәктәп йылдарында уҡ ваҡытлы матбуғат баҫмаларында шиғырҙары баҫыла башлай. Мәктәпте тамамлағас, 1966 йылда Башҡорт дәүләт университетының филология факультетына уҡырға инә. Студент йылдарында ижад донъяһын Таңһылыу Ҡарамышева, Гөлфиә Юнысовалар һ.б. менән бергә яңынан аса. Артабан, 1970-1975 йылдарҙа Стәрлетамаҡ пединститутында белем алыуын дауам итә. Салауат районы Малаяҙ ауылына килен булып төшкәс тә, мәктәптә уҡытыусы булып хеҙмәт юлын башлай. Тәүге “Бүләк” исемле шиғри йыйынтығы институтты тамамлағанда 1975 йылда донъя күрә. Аҙаҡ инде бер-бер артлы 1981 йылда икенсе китабы “Ирәмәл ҡыҙҙары”, ә 1989 йылда өсөнсөһө – “Әсә һүҙе” тигән китаптары сыға. Ҡыҙғанысҡа ҡаршы, 1995 йылда ни бары 46 йәшендә генә Рәмзилә апай яҡты донъя менән хушлаша. Умырзая миҙгелендәй, һандуғастың һайрар мәлендәй ҡыҫҡа ғүмер бирелһә лә, шағирә шиғриәт донъяһында мәңге яныр, сағыу йондоҙ булып балҡый алды.